 |
Nyawang Layung Di Cisurupan
Cisurupan dina mangsa burit
layung beulah kulon
mega beureum mindingan srangenge
angin leutik tiis ngahiliwir
ngusap pucuk eurih
di tutugan gunung
Kuring nyawang gumebyarna langit
nyacapkeun kasono
neuteup layung nu jadi totonden
beurang anu anggeus tereh pamit
baganti jeung peuting
disapih ku waktu
Sora manuk rarecet rek ngampih
ka dahan ngaroyom
sanggeus beurang cape udar-ider
neang milik keur tatali hurip
piwelas ti Gusti
ka sakabeh mahluk
Rarasaan bet kaseuit-seuit
sabot kuring nenjo
mubus tilemna cahya srangenge
nu satia ngahibaran bumi.
jeung mahluk kumelip,
damelan Yang Agung
Tina Piwulang basa 1992 – ku : Agung Pangestu