Ulama Dayah, Bak Jalan ALLAH Geutem Peujuang – Teks Ca’e Aceh
Loen puphoen rika ngoen nama ALLAH
Deungoen BISMILLAH loen mula karang
Salam’alaikum warah matullah
Saleum ukhuwah dari loen tuan
Hana sit teuwoe loen pujoe ALLAH
Yang ka geulimpah lezat keu manusia
Seulaweut saleum keu RASULULLAH
Nabi yang meugah panghule alam
Saleum mulia para sahabah
Bak jalan ALLAH geutem peujuang
Takzem mulia ulama dayah
Yang ba amanah terhadap manusia
Oh noe keuh dilei ulei khutubah
Jinoe loen peugah asoe tujuan
Beugoet neu simak oe mak ngoen ayah
Judul loen peugah lahe janjongan
Meukru seumangat lezat kolam ALLAH
Neubi beu ek pah keuloen anggapan
Loen keuneuk satoeh saboeh sejarah
Yang na faedah keu umat islam
Rabiul permulaan tanggal dua blah
Oh seuboh beukah lahe janjongan
Bak malam senin yakin eo sahbah
Aneuk abdullah geunaseh dewa
Meugrak teukeudi geubi le ALLAH
Patong lam ka’bah hancoe meutimphan
Seureuta mate sare dum gajah
Kendran abrahah nibak wate nyan
Cukop gembira di hamba ALLAH
Ureung di makkah hate that seunang
Wab karna nabi dali kaleumah
Aneuk aminah panghule alam
Abdul mutalleb peuwet wet ka’bah
Nyan nabiyullah geu tingkue sajan
Shalam’alaika geu baca bagah
Peutawaf ka’bah kiblat sembahyang
Di debu lahab sahbat meutuah
Seunang meuleumpah nibak wate nyan
Geupeumerdeka sidara ceudah
Meu nan suwaibah lamiet di gob nyan
Hingga oh mate wahe eo sahbah
Pre azeub ALLAH malam selanyan
Adak yoeh dilei jithei that juwah
Agama ALLAH sabe geu lawan
Dumnan keuh bagi geubi le ALLAH
Wab seunang leumpah lahe janjongan
Pue lom geutanyoe yang pujoe allah
Tuboeh teuh leupah nibak jahannam
Oleh seubab nyan rakan meutuah
Dari sejarah coek kesimpulan
Beuloe seulaweut dak juet bak babah
Keu rasulullah panghule alam
Bak buleun moloet patoet seuleuah
Du bena gampang khanduri rijang
Beutapeurayoek oh katroek jatah
Bek rugoe peugah droe ureung islam
Lam sithoen sigoe atra nyoe ayah
Peugoet walimah keu muhammadan
Beuna ta rela harta ta seumbah
Ngoen hate ikhlah seureuta seunang
Oh uroe dudoe tanyoe geu keubah
U dalam jannah syuruga lapan
Sinoe di donya harta teuh berkah
Hudep han sulit uroe ngoen malam
Meubek tapateh wareh meutuah
Haba gob peugah yang macam-macam
Misue na ureung yang khuen bieu’ah
Yue baca bagah hadis janjongan
Lam hadis nabi bukti pih jeulah
Lam kitab yannah sinan na geutrang
Bak saboh nanggroe tanyoe meulangkah
Ngoen hate ikhlah kasat lam badan
Oh ban troek keudeh wareh meutuah
Teungoeh geupeugah lahe janjongan
Lage mirip ta kasat langkah
Lam keubon jannah meunan tamselan
Oh noe mumada haba loen peugah
Meunyoe na salah neubi teugoran
Izin loen lake dile beu bagah
Uloen toep dongeng deungoen wassalam.
 |
| Takzem Mulia Ulama Dayah, Bak Jalan ALLAH Geutem Peujuang – Teks Ca’e Aceh |