Tentra Kamate Tanle Ka Punah, Disinan Jeulah Datang Yahudi – Teks Ca’e Aceh
Ngoen ridha Allah langkah kemari.
Bacuet loen satoeh saboeh kaidah
Seubagoe kisah lahernya Nabi
Seumoga hase hate beumudah
Kadeungoen iklah banja mulai.
Uloen mula phoen kuntom silsilah
mula ‘abdullah’ ayah di Nabi
‘Abdul Mutalleb’ sabet nyang meugah
Dinanggroe meukkah ureung segani.
Lam bani ‘hasyem’ hade ‘abdullah”
Umue lapan blah muda sekali
Neu ijab kabol beutoi ‘aminah’
Lam bani ‘zuhrah’ ‘wahab’nya binti.
Di cahaya nur mansur ‘abdullah’
Sigra teupinah keuheundak Rabbi
Sampoe meungandong kuntom ‘aminah’
teuma ‘abdullah syahed lam pergi
Nanggroe madinah kubu ‘abdullah’
Lam saket parah riwang kolam Rabbi
Nabi kayatim sidiem tan ayah
Kandong ‘aminah’ nam buleun ummi.
Baksaboh abad bala ‘thoen gajah’
Tentra ‘abbrahah’ kakbah neubenci
Limoeng tujoh sa masa maseuhah(masehi)
Disinan jeulah tiba yahudi.
Laen teukeudi ‘fayakun’ Allah
Tentra ‘abbrahah’ Allah peubasmi
Cicem ‘ababil’ gaki ngon babah
Apui nyang mirah neuprang ‘yahudi’
Tentra kamate tanle ka punah
Surat ‘al-fill’ lah cerita abadi.
Tanda neu hormat rahmat bak Allah
Lahe mustafah alam peusunyi.
Rabi’ul permulaan fajar ban beukah
Tanggai dua blah kolam seunen hari
Kateuka lahe nyan Rasulullah
Keuheundak Allah di ‘ulul azmi’.
Dum bilatang gle parte ie basah
Jak hormat bagah lahe nya Nabi
Singa ngoen rusa rasa meusiblah
Si ulah ulah meuhat helsingki.
Seuluruh kayu teukui le bagah
Langet nyang indah peurehat diri
Bilatang nyang poe sigoe meusinggah
Fajar ban beukah keubeit lah sunyi.
‘Lailatul qadar’ meuhat le Allah
Keu Rasullullah mandum menanti
Illa bilatang dua nyang meugah
Tukang meubantah asee ngoen babi.
Sidumnan kuddrah iradah Allah
Samboet mustafah kekasih Rabbi
Meuwoe loem punca bunda ‘aminah’
Seunambong cerita kiban terjadi.
Hana nyang saket sabet aminah
Sehat meuleumpah manusia ngoen hati
teucrup ngoen badan di Rasullullah
Hana waladah khatam ka suci.
Sira neudali Nabi ngoen jeulah
‘ummati’ sahbah ulang lhe kali.
Keudeh ulanget neutunyoek bagah
Tanda keu Allah tauhet peupasti.
Teuka mariyam siti ainsyah
Keunan neusinggah neupeungoen ummi
Neucuba beuot tuboh nyang indah
Teukeudi Allah han ek neu uji.
mariet le rijang uleh aminah
Meunoe neu papah wahe oe ummi
Ngoen ija sawak neubaloet bagah
Angkat muslihah nyan tuboh bayi.
Meuban geu beuot teusamboet bagah
Haroem puen bicah meube kasturi
Teuka bebewan rumoh aminah
Dinanggroe makkah baroe seukali.
‘abdul mutalleb’ neuwoe le bagah’
Seunang meuleumpah lahernya Nabi
Neucok neuguboe ujoe ngoen iklah
Disampeng kakbah tawaf tujoh krie.
Sira neumusue narit ngoen babah
Lafat nyang indah peuteubit dali
Salam ‘alaika salam ‘alaika(h)
Salam’alallah huya aznani.
 |
| Tentra Kamate Tanle Ka Punah, Disinan Jeulah Datang Yahudi – Teks Ca’e Aceh |