Sejarah Istana Bogor Dina Bahasa Sunda

Istana Bogor nyaéta salah sahiji ti 6 Istana Présidén Indonésia. Istana Bogor pernahna di Jalan H. Juanda No.1, Kalurahan Paledang, Kacamatan kota Bogor Tengah Kotamadya Bogor, Jawa Barat . Lega wewengkonna 28,4 héktar, perenahna di Garis koordinat 106°47’ 796” BT jeung 06°35’618” LS, kurang leuwih 60 Km ti Jakarta atawa 43 Km ti puseur Kota Bogor. Tanah di Sakuriling Istana Bogor nyaéta lahan anu biasa disebut Kebon Raya Bogor. Aksés ka Istana Bogor henteu hésé sabab Istana Bogor aya di Tengah Kota.

Istana Bogor diwangun ku Gustaf  Willem Baron Van Imhoff 1745-1749, baheula dingaranan Buitenzorg atawa sans souci anu hartina euweuh kahariwang. Lokasi istana dipilih ku Van Imhoff sorangan sabab kairut ku katingtriman hiji kampung anu ngaranna Kampung Baru, patilasan Karajaan Pajajaran. Van Imhoff sorangan anu nyieun desain, nyonto kana arsitéktur Bienheim Palace, imahna The Duke Of Malborough, deukeut kota Oxford, Inggris. Awalna, Van Imhoff miboga rarancang pikeun ngawangun éta daerah minangka daérah pertanian jeung daerah reureuh nalika piknik. Istana Bogor mimiti diwangun ngan ngawengku tilu tingkat wungkul, prosés ngawangunna diteruskeun ku Gubernur Jendral Jacob Mossel (1750-1761). Tanggal 10 Oktober 1834, Istana Bogor kungsi ruksak alatan gempa vulkanik.

Bagian depan istana di Buitenzorg setelah gempa tanggal 10 Oktober 1834 Lukisan karya “Willem Troost (II)”

Taun 1850, istana diwangun deui tetapi henteu ditingkat sabab rawan gempa. Dina mangsa pamaréntahan Gubernur Jéndral Albertus Jacob Dujimayer (1855-1856) wangunan heubeul diruntuhkeun terus diwangun wangunan anyar anu maké gaya Eropa kala ka-19. Taun 1870, Istana Bogor dijadikeun imah dines Gubernur Jéndral Hindia Walanda jeung Inggris. Nu nempatan terahir Istana Bogor zaman harita nyaéta Gubenur Jendral Tjaarda Van Starkenborg Stachurwer, sabab kudu masrahkeun Istana Bogor ka Jéndral Imamura, taun 1942. Taun1950, Istana mimiti dipaké ku pamaréntah Indonésia, anu satuluyna diresmikeun jadi Istana présidén.

Gedung Induk ngawengku 8 rohangan nyaéta (1)Rohangan Garuda, anu pungsina minangka tempat rapat atawa resépsi, (2) Rohangan Taraté, daerah narima tamu, (3)Rohangan Pilem, nyaéta kawasan muter pilem nalika zaman Ir. Soekarno, (4) Rohangan tuang, (5) Rohangan gawé Présdén, nyaéta kawasan présidén Soekarno digawé, (6) Pabukon, (7) Rohangan kulawarga jeung pangkéng nyaéta daerah présidén istirahat, (8) Rohangan mentri.

Gedung Utama Sayap Kénca miboga 2 rohangan, nyaéta (1)Rohangan Panca Negara, kungsi dipaké jadi rohangan konferénsi Panca Negara/pikeun nyiapkeun Konferénsi Asia-Afrika, (2)Rohangan tengah jeung Pangkéng, nyaéta rohangan pikeun présidén atawa tamu nagara jeung tamu agung ngéndong.

Gedung Utama Sayap Katuhu, nyaéta kawasan ngéndong para Présidén minangka tamu nagara, paviliun sayap kiri dipaké pikeun kantor Istana Bogor sedengkeun paviliun sayap katuhu dipaké pikeun tempat ngéndong para pajabat jeung staf tamu nagara.

Pabukon jeung Barang Seni istana Bogor mibanda koléksi buku anu jumlahna 3.205 judul, anu daptarna aya di pabukon Istana. Lian ti buku, Istana Bogor ogé miboga barang-barang seni saperti lukisan, patung, jrrd. Ayeuna, Istana Bogor ngoléksi 448 lukisan nu judul lukisan, pelukis, katut taun lukisna aya dina wangun daptar anu matak teu ngahésékeun saha waé nu rék néang inpormasi ngeunaan éta lukisan. Pon kitu deui patung katut sagala bahanna, di Istana aya nepi ka 216 patungna. Lian ti patung jeung lukisan, Istana Bogor ogé ngoléksi barang-barang porselén anu jumlahna 196 porselén. Sakabéhna aya di Jero Istana, saluareun anu dipaké jadi dekorasi rohangan.