Panton Hikayat Ureung Aceh, Lembaran Seujarah
Assalamualaikum Warahmatullah
Jaroe dua blah nyengna kolam tuboh
Kadang hana roh wate lon ba dongeng
Silap ngen salah meuah rakan beh.
Saleum pembuka awai lon peuhah
Supaya nak ceudah haba lam ratoh
Sigalom takayoh keutangen tapandrah
Kadang cit reubah bhan jih beureutoh.
Keu-eung campli teurasa kolam pengecap
Keu-eung lam babah wate tapajoh
Lam Gule Reuboh na bayam mirah
Leumak kuwah na engkoet teucroh.
Didalam rateb Taseubut ALLAH
Kalimah Taybah takeun beusunggoh
Taseurah tuboh terhadap Poe teu ALLAH
LAILAHAILLALLAH BEKNA TOM PUTOH.
Tasimpan beugot lembaran seujarah
Mahligai indah bek sampe runtoh
Dari hama tikoh ngen gigitan lintah
Beurela darah jile kolam tuboh.
Agama islam lembot ngen sabar
Sifeut Rasulullah geubie peunutoh
Beuthat pih musoh Islam dijajah
Bekna rasa resah JIHAD beusunggoh.
Tapinah beuji-oh Nafsu Amarah
Tapinah beubagah bekle na lam tuboh
Bek le takiroh sinoe dalam Daerah
Tanyoe tengoh dijajah jabren dari ji-oh.
Peu-peu nyeng sanggop tabie seudekah
Peu-peu nyeng mudah seulaku tuboh
Asal bek rapoh teukanceng bak pengecap
Tan sapeu peugah teu-iem dikeurupoh.
Islam sedunia laksana sie darah
Cit saboh Ka’bah lam rangka tuboh
Trageudi putoh geulinyueng siblah
Oh ban roe Darah na jaroe yg sampoh.
Merpati melayang jiwoe u meukah
Jiebeudoh tiwah jiwoe u Meulaboh
Wate berlaboh beumeusahoe Arah
Bek meula-en Arah wahe rakan Beh.
