Panton Aceh – Wahe Pemuda Aceh Meutuah, Budi Tat Cidah Lagak Tat Rupa
Nibak awai pon dengon Bismillah
Alhamdulillah ataeuh karunia
Seulaweut saleum keu Rasulullah
Sahabat leupah serta keluarga
Saleum horeumat bacut lon tamah
Keu yg peusiblah uruh acara
Keu panitia juri nyang cidah
Walau han leumah meturi rupa
Saleum meuturi rakan meutuah
Ngon hamba Allah aneuk lam desa
Neuk berani droe keno meulangkah
Tuleh risalah ihwal saidina
Wate lon pike han peu lon peugah
Peu lom seujarah ihwal baginda
Tapi lon cuba bacut lon dongeng
Neuk ujo pegah kadang meumada
Nabi Muhammad aneuk Abdullah
Lahe di meukah disinan kuta
Dari sidroe mak yang nan Aminah
Meninggai ayah periode lam prut ma
Wate junjungan lahe di meukah
Pasukan gajah teungoh meukuasa
Pasukan dimat raja abrahah
Jak serang ka’bah ngat jeut binasa
Maka jih dikeun lahe ton gajah
Nyan keuh seujarah ge nyan calitra
Tapi oeh dudo keinginanAllah
Teuntra abrahah hanco binasa
Mereutoh reutoh patong lam ka’bah
Ka habeh beukah bandum berhala
Patong dum hanco ka abeh beukah
Barang di seumah sabe dipuja
Umu 12 thon geujak suriah
Deungon adek yah jak meuniaga
Mulai meudangang mina nafakah
Hana masalah umu sep muda
Umu dua limong gob nyan meunikah
Dengon khadijah inong peutama
Bahkeuh pih umue muda sileupah
Tuha khadijah lom sidroe janda
Inong junjungan jumeulah siblah
Oh leuh khadijah,Saudah teuma
Leh nyan meukawen ka deungon Aisyah
Baroe Hafshah binti Umar r.a
Hana sep layeu bandum lon peugah
Bak laen kisah tepeugah teuma
Nyan tat geugaseh le Rasullulah
Nyan keuh Khadijah inong peutama
Cit sidroe dara dari nyan siblah
Nyan keuh si aisyah nyan laen janda
Kon na niet laen ya Rasulullah
Peu ek mareuah deurajad janda
Umu 40 thon trimong peurintah
Geubri le Allah wahyu peutama
Mulai wate nyan di Rasulullah
Jino jadeh sah jeut keu Ambiya
Nabi wate nyan pupon meudakwah
Peuturi Allah Tuhan nyan Esa
Bahpih han seunang di kaom qurah
Nabi tat sabar teutap geu saba
Oeh akhe dudo Allah perintah
Bak Rasulullah yu minah kuta
Jak minah keudeh nanggroe Madinah
Nabi geu hijrah deungon seugera
Nabi geu wafeut tangga 12
Thon 11 hijriyah kolam wate dhuha
Umu Nam Le thon meuhadap Allah
Ya Rasul Allah geutinggai donya
Seulama udep di Rasulullah
Budi tat cidah lagak tat rupa
Meututoe basa sopan neupeugah
Han tom na salah seupanyang kurun
Ngon lahe Nabi saboh anugrah
Keu hamba Allah di dalam donya
Dari hewan kaye lam tamah
Meteume berkah dari Saidina
Wahe peumuda Aceh meutuwah
Ingat seujarah Nabi Ambiya
Bek sagai tuwoe ube seujarah
Keu Rasulullah beutat ta Cinta
Wassalam akhe peunutop surah
Meupat na salah meuah beusigra
Nyoe teuntang Nabi salah lon peugah
Neutulong peupah jeut bek meudesya.
 |
| Panton Aceh – Wahe Pemuda Aceh Meutuah, Budi Tat Cidah Lagak Tat Rupa |