Ie Raya bungka jile dalam krueng.
Saket lon rasa paseung ie mata.
Wab jiduek luka tingat yoh jameun.
Yoh jameun jilee ulon syehdara.
Sirok rok periode laloe meuluem luem.
Keunoe ngon keudeh abeh lon teuka.
Sampoe sikula putoh ban meuseung.
Puelom keu neubeut nibak ulama.
Huruf aleh ba hanjeut ulon kheun.
Bek la’an kitab neuyue pleoh punca.
Beh puetra keuh ka lon jeut keu UREUNG.
Adak hewan keulon gob sapa.
Bak sang sah saja nyan ulon tunyuem.
Keurana jaeh nibak agama.
Allah nuraka bak sang meuteumeung.
Jinoe hai adoe bandum syehdara.
Mawa ngon cuda wahe e aduen.
Ulon ka sadar ka teuplah dada.
Hate ka teuka Cahya sunurueng.
Teuma sibaet haba lam Rika.
Di dalam sastra nyompat ulon leung.
Ulon peuingat kaom peumuda.
Sirok rok masa bek laloe bak dheun.
Bek laloe sabe jak puta puta.
Jak jeb AQUA sideh bineh krueng.
Abeh neubahue duem aneuk dara.
Diyuep meuriya neujak mat mat keung.
Bek laloe tugok ie dalam kaca.
Bek cit neuputa bakong teungeoh juem.
Bek laloe antok batee kolam meja.
Nyan on cap buya bek siek le aduen.
Bek laloe sabe jajan neumita.
Bak jalan tuha neuhue dalam seung.
Cit hanjeut kubuet nyan buet dum mungka.
Lon yang ka rasa JINOE PUE LON THEUN?
Leubeh get beudoh jinoe syehdara.
Tuha ngon muda dakjeut ban mandum.
Tajak peupunoh meunasah tuha.
Meuseujid Raya jaroe tajak leung.
Suboh ngon luho jitamong asha.
Meugreb ngon insya deong likot imum.
Beusaban saban jinoe beusada.
Ngat gadeoh bala kuta ngon uteun.
Miseu geutanyoe meunan keurija.
Niscaya teuka aman dum ureung.
Nikmat Allah bri meugunca gunca.
Sang lam syuruga nasihat troh taceung.
Dan lom pih makmu nanggroe pih kaya.
Alem ulama jeh ka tatem tueng.
Kuta ngon duson seunang cit teuka.
Tanle syehdara geumeukeung meukeung.
Adak na musoh jilop lam para.
Nyan buya buya bandum payah plueng.
Jeh seubab tanyoe bandum mulia.
ALLAH TA’ALA taingat tiep jeum.
Meukrue seumangat pacok ie nira.
Kateuplah dua diyeuh le rimueng.
Meukrue seumangat rakan syehdara.
Laloe bek le na jinoe tapeunyuem.
 |
| Panton Aceh Wab Jiduek Luka Tingat Yoh Jameun |