Panton Aceh Terbaru Tema Peringatan Maulod Nabi Besar Muhammad SAW di Aceh
Salam’alaikum saleum uloen bri
keupada putri tuha ngon muda
yang na di banda atawa pasi
mandum loen bagi dusoen ngon kota
Meukru seumangat rahmat ilahi
pujoe keurabbi Azzawajalla
seulaweut saleum mandum keunabi
aneuk bak siti Aminah bunda
Keu Al ngon Sahbat deurajat tinggi
seureuta lagi para ‘Ulama
para pujangga pencinta seuni
seumoga geubi sehat sejahtra
deungon bismillah loen langkah gaki
loen ujoe nyali lam sayembara
meuseubab akhlak hajat lestari
buken mendali yang uloen hawa
bah le tatamong bangon lam rawi
hai dewan juri tuloeng neubaca
Tema uloen boet Peringatan Maulod Nabi
tapeuringati lahe saidina
tasie lah keubeu ta meukhanduri
taguen bu guri wahe syedara
meunye tan kaya mita keubiri
bak ureung faki seuala kada
jeut cit tasambai boh itek lati
tacroeh ‘engkoet tri deungon jeunara
asai beu ikhah ta bagi-bagi
ta undang santri yue baca do’a
yue baca meuhat kitab berzanji
pang ulee nabi seulaweut beuna
gop kheun bideu’ah bek tapadoli
bak buet tradisi tanyoe keurija
daleh ngon hukoem tan meunyalahi
meubek keuh ragu-ragu hate lam dada
yang peugah han jeut wahe e akhi
nyan cit yahudi hana agama
beungeh keu islam ureung nasrani
nyan keuh wahabi musoeh ‘ulama
tanyoe ta ikoet imum syafi’i
si kafe keuji pue tajak kira
Jameun kon kana periode yoeh lawi
nek teuh khanduri soe larang hana
pakon keuh jinoe meunoe terjadi
rame yang benci ‘oh ta meudo’a
paloe that ladoem jantoeng that dengki
meujampu benci hate lam jiwa
han jeut geukalen ureung khanduri
laju geucaci ngon geuseurapa
ala hai dodo doda kudang di
sang rap teurjadi akhir zaman donya
ta kalen tanda kasatmata ka dali
le that ka bukti ta eu ngon mata
ka keuh meumada haba loen rawi
meu’ah beuneubi pat salah kata
seubab ken raja pujangga mahir
nyoe sinyak bayi yang intat sastra
akhirul kalam loen pulang bagi
peungamat seuni yang that mulia
izin loen gadee lakee permisi
bah le loen ili keudeh jak gisa.
 |
| Panton Aceh Terbaru Tema Peringatan Maulod Nabi Besar Muhammad SAW di Aceh |