Panton Aceh Peugah Haba, Bah Luwa Nanggroe

Di dalam donya, meumacam bagoe
Rata juet nanggroe, ka haroe hara
Donya ka akhe, lahe dum bagoe
Anuek jimulhoe, meusunoeh harta..

Ayah ngoen anuek, meukap kap gigoe
Nasiet yang meulhoe, persoalan jumba
Hana sapue khuen, dalam harueto
Maka juet meu lhoe, sabe syedara…

Nasiet di ladoem, kasoem ngon cupoe
Kajuet keu meulhoe, dilema tika
Itek dalam blang, ayam lam parek
Masalah cubek, putoeh syedara..

Tanging sidara, gura that bagoe
Mungui cut uroe, baje eropa
Pakaian kaphe, haroek han bagoe
Malah di pujoe, meurasa bangga.

Wahe ee dara, simata langgeh
Pike beu abeh, yoeh goh binasa
Male syedara, mawa ngon mateh
Gata ka paleh, ngon baje eropa..

Laen di agam, gura that bagoe
But oeh uroe, kolam jamboe jaga.
Oeh peugah haba, bah luwa nanggroe
Baje bak asoe, ka mubhe sira..

Taloe kolam kieng, meugilieng cubeh
Taloe kolam binteh, kajut keu atra.
Peng lam jaroe, meu awoe abeh
Hawa kuweh lapeh, payah saba saba…

Panton Aceh Peugah Haba, Bah Luwa Nanggroe