Inong & agam kuta ngon gle.
Gasin kaya puteh itam.
Yang iseulam bukon kafe.
Ci neusimak saboh peusan.
Harah lapan beuntuk ca’e.
judul lon boh rukon iman.
Jeut neu simpan dalam hate.
Yang phon tanyoe wahe taulan.
Ta meu doktrin sabe-sabe.
Tapeucaya sidroe ilahi.
Yang po alam rubbul kade.
Yang keudua wahe rakan.
Rukon iktikad beu tapike.
Malaikat siploh droe nyan.
Sebagian lon ci rawe.
Phon mikail yang ba hujan.
Izrail nan yang peu mate.
Zabaniah tugah gopnyan.
Bi hukoman uroe page.
Mungkar nangkir lam kuburan.
Malek rizwan lam jannate.
Tapeucaya ban 10 nyan.
Ingat rakan meubek pre-pre.
Teuma keu 3 rukon iman.
Wahe intan yakin sabe.
Tapeucaya kitab ilahi.
Taurat qur’an hai bohate.
Teuma keu 4 wahe manusia.
Dum Rasulan sifeut ade.
Beu ek ingat lam pikeran.
Meubek rakan tanyoe jahe.
Dua limong lam al-qur’an.
Geuseubot nan lumboi ganje.
Ulon tuleh sebahgian.
Ngat bek panyang lon meu ca’e
adam yang phon ayah geuh tan.
Poma pih han gopnyan lahe.
Idris yakob ngon aiyuban.
Musa rakan ureung meuse.
Ishak harun ngon syu’iban.
yusuf tampan jroh that hate.
Yunus ‘isa wa sulaiman.
Muhammadan yang teurakhe.
Yang keu 5 wahe ikhwan.
Tameu keyakinan uroe page
bangket bandum bak watei nyan.
Tanyoe insan ohleuh mate.
Yg seuneuleuh rukon akidah.
Hai cut intan seuri kande.
Tapeucaya keu teutapan.
takdir yang kuasa bandum ade.
Cicem pala di cong mamplam.
Manok siam pajoh pade.
Etnoe mantong lon meu nazam.
Ngon wassalam lon tob ca’e.
 |
| Panton Aceh Jak Beut Meurunoe Rukon Iman Hai Aneuk Agam & Inong |