Pakiban cara, ta ikat benteung
Teunte meu sumpoem, meugoem hai syara
Goeh lheuh seumula, ka han le jeut tueng
Meunan ciet hudep, nyoe keyakinan hana
Pue nyang tapeuna, banduem hana nyuem
Dak ta meuratep, meugrep ngoen asa
ka teunte fahla, hana ta teumeung
Meunan keuh conto, loen ploeh lam rika
Nibak beranda, keunoe loen sunyueng
Sunggoeh meurugoe, meupaloe bangsa
Nyang tanyoe kerja, faktual han geutueng
Surat wal’ashri, dali na punca
Ci keuh neu baca, lheh nyan neu peunyuem
Ayat nyang saheh, leubeh duem makna
Allah nyang peuna, rapi tan jareung
Sinan neu atoe, asoe phoen mula
Akan keu hamba, meunyoe ciet tatueng
Asai phoen hudep, bangket u donya
Iman lumboi sa, sinan geusareung
Meu ban na akidah, di dalam dada
Teuntei keudua, cara ta peutheun
Ciet ngoen ibadat, ta ikat punca
Suroh ta kerja, meubek meu lheung lheung
Uroe ngoen malam, sepanjang masa
Sampoe bak dhuha, beuna tanyoe leung
Meunan keuh nyang hak, tagrak hai syara
Meubek na cupa, dalam tiep tiep jeum
Teuman nyang keulhei, teunte lam punca
Ilme lam dada, peurnoe bak ureung
Saleung seumeugah, surah tabaca
Bek dalam dada, sidroe ta taluem
Keupue man malem, kayeum goep puja
Dak koen ulama, jithei le ureung
Akan tetapi, tabagi hana
Tasoem lagee na, keudroe ta makeun
Meunyoe nyan sifet, kriet keu agama
Keupu man guna, janggoet nibak keung
Rugoe ta khaluet, tahjud tan guna
Ilme rabbana, han tateum suleung
Teuman keu dudoe, adoe loen rika
Nyang punca haba, keunoe loen manyuem
Meu ban lheh manduem, bileung lhei ngoen sa
Sipue teuk teuma, meubek neu hireun
Meuban na kepercayaan, di dalam dada
Saba hai syara, sabee tiep tiep jeum
Saket ngoen mangat, ingat beu sigra
Meu bek jeut lupa, peungeh ngoen reuneum
Saba bak bala, nyang ka geucoba
Saba bek riya, ngoen manduem ureung
Saba kolam saket, meucupet kurun
Saba bek bangga, embong meukaleung
Saba bak fitnah, babah meubisa
Dalam buet dosa, bek ta peureumeun
Saba lam hudep, phet that terasa
Saba lam cita, pajan meuteumeung
Nyoe biet manduem nyan, rakan ta kerja
Nikmat lam donya, ciet ka tateumeung
Meunan ciet hai bang, watee tagisa
Dalam keureunda, peungeh meu dreung dreung
Kubu han seumpiet, meugriet teurasa
Akan cahaya, peugeuh ban buleun
Meunan geumariet, saidil mustafa
Ingat hai syara, lagee nabi kheun
O’h nan lam bareh, syareh loen rika
Nyoe biet na cupa, meubek keuh neu kheun
Maklum loen koen syeh, kolam MUDI MESRA
Ilme lam dada, lipeh ban beuneng
Nyoe biet na salah, surah nyang loen ba
Nibak ulama, laju neu diyeung
Keudeh u dayah, langkah neu teuka
Wab loen hai syara, mantoeng that pateun…
 |
| Panton Aceh Bhok Saba Bak Fitnah, Babah Meubisa |