Lirik Syae Aceh, Lahe Pang Ulee
Taplah kolam tingkeum, keu papeun rumoh
Tabeoh rang teungoh, timang bek singeit
Salam’alaiKUM, saleum cukop jroh
Bak phoen peubeudoh, syae lon raheit
Horeumat mandum,ureung lon satoh
Putiek deungon groh,supee ngon kineit
Rame ka useung, lam mideun punoh
Leo that yang tu’oh, beling ramineit
Allah neu tuduem, seukeum pade soh
Neupeujeut kolam yoh, bumoe ngon langeit
Uroe yang su’um, tuleung sang tijoh
Nyan miseu pola, haba lon liweit
Ujeun meuguduem,tam tum su kreh kroh
Reubah bak jaloh, ateuh bak kunyeit
Hate beuleuheun,jangeun bek reuloh
Jaroe bek keuboh, gaki ngon tumeit
Eungka yang meuleung,ruweung ka runyoh
Mandum kabeh soh,kuweh dalam bleit
Baro lon sunyueng,keunuweung lon ploh
Haba bek neukoh, meu unyet-unyeit
Dilee yoh jameun, ureung kop meu roh
Neuk inong dipoh, meuhambo manyeit
Han payah takheun,padum ta eungkoh
Aneuk droe yang toh, takue jitem kreit
Teugok ie hareum,taluem tip beungoh
Lakoe peurumoh, han’ek le mumeit
Kafe seuh bajeung, ureung sep jumoh
Yang mangat tapoh,ngon kayee kunyeit
Macam peukateun,meu peung meulanoh
Dak miseu bakoh, dikap le ringeit
Mubek neuhireun, limpeun uleu coh
Takot teugantoh, meutigon gameit
Kheundak yang agueng,wate jeum suboh
Cahaya deuh jroh,seumulhoh langeit
Lahe u mideun,ban buleun timoh
Hana soe ek koh,cukop meu geudheit
Mubei meukeuteung,haruem meukuboh
Hana pat acuan,deungon minyeuk preit
Munan hai adeun, sidum nan keuh jroh
Tuto lon roh-roh, kon cilet-cileit
Lam ka’kbah tam tum,meulinteung roboh
Patong dum reuloh, dalam sigo seit
Masa nyan hireun, pinyueng meu yoh-yoh
Tameh padum boh, su ban teurompeit
Rasa teugageung, meusareung leumoh
Lagee teugantoh, meu cu’et ngon kareit
Sara geu tapueng, ba plueng sep teugoh
Keulileng deh doh, tujoh goe atreit
Kon jut neu maklum, hai imum batoh
Han payah uroh, ulon meu pep-peip
Ban sibuju rueng, sadum neutu’oh
Panghulee saboh, bintang meu blet-bleit
Seulaweut saleum,lam seung beu kuat
Bek lah neu dahoh,gaki neu wet-weit
Beu tapeureumuen,meu krum tarawoh
Hate beu saboh, leukit ban magneit
Mulia ureung, han geukheun jeumoh
Celeng geutem proh, keu asoe dumpeit
Geutem keureubeun, kolam buleun yg jroh
Hana yo gadoh, eumpang keuripeit
Mu’iddah neutueng,ban naleung teukoh
Hate bek syeh syo’h,sabe beu lengkeit.
Adak teung bayeung,beukum eungkot noh.
Aleh pue lom roh,ka hi mubei kheip.
Cukop leo udeung, neuheun blang poroh
Tuto lon sareung, cabeung tan meu’oh
Akai goh punoh, hai teungku juneit
Sambe seek naleung, bineh leun rumoh
Mata beu seh soh, buka interneit
Meu’ah lam jangeun,kureung lon tu’oh
Kadang meupingkloh,tan keunong mandret.
 |
| Lirik Syae Aceh, Lahe Pang Ulee Oleh: ILHAM SUNJAYY |