Pangkai Bek Tuwoe
Deungoen bismillah ,beutuah rampoe
Saleum loen ujoe,kolam awai karang
Salam alaikoem,kawoem sinaroe
Lakoe ngoen binoe,cucoe bak adam
Alham dulliah, allah yg poe droe
Sigeunap pujoe,ngoen jiwa badan
Yang geubi rahmat,meukeumat asoe
Hate tan tuloe,mata geupeutrang
Seulaweut saleum,mandum beusampoe
Keu nabi tanyoe ,rasul tauladan
Lheuh nyan keu sahbat,meuhat han tuwoe
Seunambong jaroe,pang ulee alam
Keu keuluarga,hana chit tuwoe
Aneuk ngoen binoe,cucoe pih meunan
Sampoe ulama,silingka nanggroe
Awai ngoen dudoe ,tasanjoeng saban
Takzem keuguree,tentee saban proe
Ureung peureunoe ,phoen that mukaddam
Meu ikoet turoet,patoet han bagoe
Troeh guree rampoe,seuni tulesan
Keumeukaddimah,meukeumah jinoe
Loen peuseuleusoe,meubek le panyang
Idinkeuh keuh siat,teumpat keulon nyoe
Meuneuk meureunoe,sira meu ulang
Pah musem keumang ,peusambang bumoe
Bungoeng meutaloe,timoeh bak karang
Di nanggroe meukah,lahe lah sidroe
Pang ulei nanggroe,rasul janjungan
Lam faja timoeh ,seuboeh goeh sampoe
Peungeuh jeut nanggroe,leuman trang bandrang
Syah ya jeureulah,leumah meulangoe
Phoen dari bumoe,meutop lam awan
Patoeng dum reubah,patah meuranjoe
Kheundak nibak poe,wate laah nyan
Apui seuneumah ,meugah gop pujoe
Majusi yg poe ,pih loen meukeupam
Hingga jeut karu,sibuju sagoe
Kaphe meupaloe,ka habeh mumang
Tan le pue seumah,punah peuneujoe
Ka tahoe keudroe,kafhe jahannam
Hinan keuh awai,pangkai islam nyoe
Hingga troeh jinoe,leumah deuh keusan
Sidum na rahmat,lezat hudep nyoe
Tarasa keudroe ,hai mandum taulan
Maka pike teuk ,hai neuk uroe nyoe
Bek le meulaloe,tapeukoeng kepercayaan
Adak gob peugah,bid ah ngoen rugoe
Meubek tapakoe,haba yg meunan
Rabiul awai ,pangkai geutanyoe
Dak jeut uroenyoe,bek tapeukambam
Tapeumeuriah,beupah tahiroe
Rasul keududoe,ngoen bagoe macam
tameukhanduri,tasie ngoen lumoe
Seulaweut pujoe ,dike ta paban
Takheun barzanji,nabi tasiboe
Yatim lam nanggroe,tanyoe peuseunang
Meunasoe teugah,bah bek neupakoe
Bak buet geutanyoe,keupue gob jak tham
Daleh pih ingat,meuhat nibak droe
Nyan nabi seupoe, ? Yg jaweub iktikad
Yoeh goeh lom gadoeh,tasatoeh bek yoe
Meukoen geutanyoe,digop chit ka han
Harap labajai,pangkai bek tuwoe
Syufaat sampoe, tarasa teuman
Suloeh yang awai,meugeupai uroe
Suloeh keududoe gadoeh seupoet klam
Oeh noe keuh riwai,tukai lam rampoe
Katroeh hat rampoe lanja meulansam
Meupat na salah,meu ah keuloen nyoe
Bak aduen adoe,uloen harap kan
Kakeuh meumada,rika seuleusoe
Keuneubuen taloe,loen kheun wassalam,
 |
| Lirik Cae Aceh, Pangkai Bek Tuwoe Oleh: APA SEUMAN TOT PULOT |