Lam Hadist Nabi Kaleuh Geu Peutrang – Teks Ca’e Aceh
Alhamdulillah Allah lon puji
Bak awai rawi mula meu kalam
Seulaweut saleum ireing keu nabi
Rasul yang kuasa panghulee alam
Keu Al ngon sahbat meuhat chit lagi
Keu jago baiti wali janjongan
Lom keu ulama tabi’ tabi ii
Peuwaris nabi di kiamat
Salam a’laikum kaum islami
Saleum ulon bri keu mandum taulan
Tunong ngon barouh trouh bineh pasi
Putra ngon putri lon bagi saban
Beureukat do’a poma ngon abi
Ya Allah neu bri hatei beu lapang
Beu eik lon karang teuntang NUR nabi
Peuneujeut rabbi asai mulaan
Di dalam kitab meuhat geu isi
Lam hadist nabi kaleuh geu peutrang
Bak tajul mulok beu trouk neu kaji
Aso lam rawi kon haba rantam
Meu so teim baca ngon suka hati
Pahla tuhan bri keu gata intan
Beu jeut takeunang lam sanubari
Hikayah suci nur muhammadan
Awai mula phoun rabbon neu jadi
Nyan keuh nur nabi panghulee alam
Golom na laein jein deungon bumi
Golom cit jadi siti ngon adam
Allah peujeut nur cahya berseri
Rupa pih tari hana bandengan
Bentuk ban ciceim khendak tuhan
Meunan geu rawi geubri citra
Sabei lam pujo keu sidroe rabbi
Hana tom khali sujud keu dewa
Lam tiep tiep kala hana berhenti
Geunaseih rabbi yang maha rahman
Siploh ribee thoen lam saboh rawi
Sujud keu rabbi nur muhammadan
Kasampoe watee lagee ban komitmen
Firman ilahi yuo beudoh rijang
Beudoh sembahyang e NUR yang suci
Perintah rabbi lagi masanyan
Limong boh watee wajeib kerja i
U ateuh diri ummat pih siban
Ciceim seumateih pateih ilahi
Hana meu ungki hana bantahan
Geu seu’on titah Allah hu rabbi
Geu junjong tinggi mandum suruhan
Sinan mulaan tuhan neu jadi
Bak nur habibi ban mandum uram
Mandum lat batat disinan jadi
Aras kurusi ngon syurga lapan
Nibak ulee nur Allah neu jadi
Saidina Ali sahbat janjongan
Di sinan asai sahabat nabi
Saidina ali geubi gelaran
Nibak mata nur kanan ngon kiri
Cucoe di nabi jadi di sinan
Hasan ngon husein cuco di nabi
Aneuk kolam ali sukee jagoan
Bak takue cicem dewa teukeudi
Sinan jeut putri aneuk janjongan
Fatimah zuhra nama geurasi
Aneuk di nabi tari rupawan
Bak sayeup uneun Allah neu jadi
Abu bakari siddiq geularan
Sahbat that jujur hana ngon peukri
Hana sekali deungon dustaan
Saidina usman meunan chit lagi
Sahabat nabi aneuk di affan
Nibak iku nur disinan jadi
Kehendak rabbi po sidroe yang kuasa
Teuka fireuman lom nibak rabbi
Qalam yang suci nibak hak rahman
Laoet yang luwah Allah neuk jadi
Bak nur yang suci rabbi jadikan
Laoet meuhalak lagak ngon tari
Meulaein persi lagi laein nan
Laoet yang keu phoun nama a’mali
Bak laein rawi lon bri sambongan
Nyo ka beih jatah ka leupah rawi
Ka geu namun lam undang undang
Meu’ah keu ulon kawom islami
Ulon akhiri deungon wassalam.
 |
| Lam Hadist Nabi Kaleuh Geu Peutrang – Teks Ca’e Aceh |