Berikut ini Contoh Cerita Lucu dalam Bahasa daerah Aceh Tentang Aneuk Bue Ngon Buya Cut :
Gajah mate tinggai gadeng.
Rimueng kureng duek keuraja.
Lam hikayat buhu laen.
Ulon sunteng tiep kutika.
Tajak ugle pileih urot.
Jeut tapeugot taloe tima.
Kiban haba tapeurampot.
Lagee ceukot phon geuyue ba.
Guna baci koh seumantok.
Ampon dawok ulon sapa.
Saboh cerita keunoe katrok.
Bacut lon jok keupeunawa.
Dalam uteun na kolam tampu.
Pah keututue di krueng raya.
Ca’e lon ba buhu jampu.
Uram iku neupareksa.
Kaseip etnan awai ratoh.
Bah lon peutroh asoe rika.
Jinoe laman keudeih talhoh.
Nyang bek kiroh kolam neubaca.
Meukawan bue dicong rambot.
Lheuhnyan jigrob u cong jeumpa.
Dalam alue leupah kalot.
Muka jih krot aneuk buya.
Jitron keunan bue nyang ubit.
Jak meunarit deungon buya.
Ka jitanyong puena meugriet.
Kiban wasiet kolam ayah’nda.
Pat toh ayah teuh meulinggai.
Dumna beukai nyang tarasa.
Kiban dongeng cipeugah hai.
Dari awai taceurita.
Buya ubeut tampang cincu.
Kameuheuheu peunyum lara.
Baten seudeih teu ingat du.
Jinoe ngon bue jimeuhaba.
Bukon sayang lon eu pade.
Kabeih mate ie raya ba.
Meunoe udeip that meusampe.
Hana ngonle dalam doenya.
Konle sayang lon eu meurak.
Bulee lagak gohna judo.
Tanle rakan kabeih jijak.
Dalam barak lon teutaheo.
Konle sayang lon eu bileih.
Bak rueng puteih mata mirah.
Dumna rakan jikeuriweih.
Lon hai wareh jitem keubah.
Konle sayang bungong riwat.
Duroh lumat keunong uroe.
Ayah poema mantong sihat.
Rumoh meupat tinggai lon woe.
Cukop gura lon eu den-den.
Badan rampeng keudeh jipoe.
Ayah sihat lahe baten.
Meunan dalem lon peusampoe.
Konle sayang putik sukon.
Jirhah le m’bon kabeh mala.
Bak mita ngon hate rihon.
Meunan ampon nyang sibeuna.
Gata subra di cong rambot.
Lheuhnyan tagrob ucong panjoe
Di lon sinoe beungoh seupoet.
Hate kalot tinggai sidroe.
Si bue ubit sang teukoko.
Ie mata ro deungoe khaba.
Buya peutroh macam ba’ o.
Laen pih leo han eik kira.
Meunyoe meunan nyang takisah.
Lon tapeusah keu syedara.
Pue-pue na hai jeut tapeugah.
Teuntee bagah lon seudia.
Banlheuh sinja teuka seupot.
Kisah tagot keuma buya.
Aneuk lidah ka jikawot.
Pakat turot u kuwala.
Tanyong le ma bak aneuk jroh.
Hoe tarawoh, dipat laloe.
Sabe tajak, banlheuh suboh.
Lheuh nyan gadoh, seupot tawoe.
Alahaima pue neutanyong.
Lon mita ngon tiep kutika.
Rata lubok ka lon tamong.
Tansoe meungon sinoe hai ma.
Krueng jeureuneh leo seureudeng.
Deungon kareng jimeuhaba.
Ateuh kolam jok na tikoh teng.
Tok ngon bajeng jimeuseunda.
Dalam alue udeip tirom.
Jiteim meusom lam ie ceukoe.
Hana rakan nyang tem meungon.
Lam doenya khong sang lon sidroe.
Pue salah ma, lon mita ngon.
Ji’oh kunom tan meurasa.
Rata paloh payah duhong.
Dumpue sang kon lon keurija.
Baten rangoe hate kalot.
Di yub rambot payah lon moe.
Deuh mitra bue watee kabot.
Sinan larot lon tiep uroe.
Trok aneuk bue, tanyong hai du.
Beungoh minggu lon meuhaba.
Jitem meungon sinan laju.
Ka saboh su kamoe dua.
Keunan kayem lon jak hai ma.
Leo kawan kra lon meuturi.
Pue nyang meuheut jiseudia.
Dak boh ara keu lon jibi.
Rumoh manyang di cong pala.
Aduen apa rab sireutoh.
Udeip makmu sijahteura.
Keunan hai ma ulon piyoh.
Duek meutamon yub bak sukon.
Bue pih jitron jak meuramuen.
Kadang-kadang jijak ngon lon.
Pakat rawon meulangue krueng.
Bue nyang ubit duek rab iku.
Nyang mata hu duek bak keuing.
Rata lubok ulon bahue.
Macam kuru lakee peudieng.
Kadang-kadang jipot boh u.
Uroe sabtu jikawe bieng.
Kayem hai ma lon jijamu.
Trok saboh mu jibi boh drien.
Ma buya cut teukhem siat.
Peugah ligat bak si haloh.
Poema hai neuk saket urat.
Macam ubat ka lon pajoh.
Ubat tuleung linde linong.
Meusaboh khong sinoe tanle.
Mungken mandum kabeih jinom.
Jijak meusom lam krueng pante.
Ubat burut saruek kiyong.
Sideh jidong di cong awe.
Leo tapajoh tubuh keumong.
Babah meuhong mubee bangke.
Kenoe keudeh kujak tanyong.
Saleh keunong jipeusampe.
Tabeb peugah na kolam eungkong.
Himbee carong jisom gambe.
Payah taphok umpung sidom.
Bak bue ceugong tacok hate.
Pajoh ubat bek nyoe-nyoe kon.
Ci taba ngon keunoe lele.
Ijo kuneng putik langsat.
Blah rot barat musang pajoh.
Mungken jinoe kana ubat.
Bue nyan siat tayue piyoh.
Keunoe taba bue nyan saboh.
Tapeurawoh pajan jitem.
Pakat laju singoh beungoh.
Dalam rumoh tameukhem-khem.
Tanle laen rakan lon ma.
Tok kawan kra nyang tem meungon.
Watee singoh keunoe teuka.
Bue ceulaka gadoh jawong.
Mungken le ma neucok hate.
Dijih mate lheuh ma seunom.
Hoe lom hai ma lon meurawe.
Ci ma pike nyang lon tanyong.
Tamse ubat hanya linde.
Lam krueng pante lon drop linong.
Kadang poema meuheut gambe.
Dak himbee gle, jeut lon tamon.
Deungoe hai neuk bungong lawang.
Pue tapeutrang poema pike.
Hate tacok bue jiriwang.
Lon kap sikhan panee mate.
Buya ubeut mantong seudang.
Et asumsi that meusampe.
Adak ta eu raya badan.
Meunan kolam sang hanya lahe.
Ma ngon aneuk leo pue lawok.
Malam ka dok golom tibra.
Beungoh uroe tansoe gekgok.
Sang meuleupok dalam kama.
Akai bakoe buya jeuheut.
Golom teubleut dalam lumpoe.
Keu hate bue nyang jimeuheut.
Bak aneuk cut jipeusampoe.
Aneuk lidah pucok bawang.
Goh jeut timang beutoi salah.
Nyang ma peutroh deungoe rijang.
Bahthat irang mungken kapah.
Dalam uteun bue jipreh-preh.
Hoe ka jiweh aneuk buya.
Puena gampang jipeumeungkleh.
Uroe jadeh sampoe asa.
Dalam paya na seureudeng.
Manok bireng trang jiku’uek.
Bue nyang ubit ruman cuken.
Lam krueng kayem ka jijingeuk.
Uroe sinja deuh buya cut.
Trieng jisumprut seunang konle.
Tanyong bagah pue nyang meuheut.
Pat takaluet lon preh sabe.
Seunang hate dua mahkluk.
Khem meukheuk-kheuk leupah rihon.
Ateuh baho bue ji iseuk.
Dalam abeuk jipeurawon.
Sira meu-en buya peutroh.
Leupah kiroh poema saket.
Bue jideungoe wajah layoh.
Ubat tuboh jipeunyum phet.
Buya ubeut sambong haba.
Peugah hai ma saket teu’ot..
Dua rakan pike cara.
Pat jimita saruek sipot.
Ubat lheuh nyan beuna gambe.
Himbee lam gle soetem kawot.
Linde linong tansoe kawe.
Suai hate pat meusangkot.
Deungoe ubat soesah badan.
Meupikiran bue nyang ubit.
Ma buya preh kolam masanyan.
Peugah lheuhnyan dallam narit.
Kadang hana linde linong.
Buya tanyong lakee hate.
Bue nyang ubeut tamah bingong.
Meutan nyawong jadeh mate.
Nak puleh ma peugah kolam ngon.
Sira jinom bue seumike.
Dalam dongeng beumeuseumong.
Bue that carong tingat mate.
Hate sideh di cong langsat.
Sinan sahbat lon som sabe.
Nak puleh ma beuna ubat.
Bagah ligat tariwangle.
Badan kamoe kheun bue lheuh nyan.
Hana sajan keubah hate.
Kamoe peuduek di cong seuntang.
Tacok rijang di dalam gle.
Buya ubeut et pikiran.
Puta seutang balek lam gle.
Trok bineh krueng jipeuriwang.
Bue that girang, kaglah mate.
Bukon sayang bungong labu.
Lheuh tatabu katroh ulat.
Aneuk bue cut jigop laju.
Di cong siku peutroh hajat.
Tunyok hate di cong panjoe.
Umpung unoe leupah raya.
Buya jirhak kajigawoe.
Jipoe unoe jitop mata.
Buya ubeut han jithee droe.
Jikap bak dhoe ladom kolam pha.
Unoe tubiet keudeh keunoe.
Leupah paloe aneuk buya.
Aneuk buya sinan mate.
Teuma bue gle kahana deuh.
Poema buya keunan sampe.
Teulah konle meutamah weuh.
Konle sayang bungong giri.
Angen halie kabeh mala.
Tanyoe udep ingat kebijaksanaan.
Sifheut keuji dak jeut bek na.
Wap ma buya pike nafsu.
Aneuk kalhu unoe seuba.
Ma buya klik ka abeh su.
Buhu jampu lon top sigra.
Naleung sira timoh leuhu.
Buya ngon bue jitak tanda.
Lheuh uroe nyan peugot karu.
Pat-pat na bue buya seuba.
Kon bak manggeh, sang kolam ruset.
Ulon liwet kabeh cerita.
Panton ca’e tapeubangket.
Nyang meupalet ci neupeuhah.
 |
| Cerita Lucu dalam Bahasa Aceh Tentang Aneuk Bue Ngon Buya Cut |