Cae Aceh Lucu – Bahkan Ji Ludah, Ji Toh Ek Geuntot
Salam a’laikum, aduen ngon Ayah
Ummi meutuah, rata meukawot
Lon jamak bandum,harum meuruah
Troh minyak mirah,han meu peu lupot
Pujoe nyang keu phon,Rabbon Poe ALLAH
Tuhan nyang meugah, han meu peulikot
Keu MUHAMMADON,sambong meunalah
Saleum nyang pantah, meunanlah patot
Lheuh nyan meusampoe,keudroe geuh sahbah
Nyang sulit payah,parang geu beu ot
Geutem syahid droe, teu peupoe darah
Demi teugak gah,islam teu bawot
Wareh u’lama,aulia ceudah
Nyang jroeh maruah, sabe bak Makbot
Ureung peu aja,nyoe ka kolam salah
Peutunyok arah,nak bek rhoh lam got
E’h nan meunalam, lam mukaddimah
Seubagoe leumah,hormat ulon bot
Jinoe hai rakan, saban ta seumah
Cae ta tamah, bahgian maulod
Hajat hai ampon,ulon neuk peugah
Saboh keunisah, kurun di likot
Di thee that agong, nama thon gajah
Jan jahiliyah,na prang that ribot
Na sidroe raja, kasus gagah
Jimat peurintah, akai that kirot
Di yaman kuta, negara luah
Nan jih abrahah,ureung seu meubot
Reuncana keuji,dari abrahah
Nanggroe habysyah,kristen di paot
Bek na yahudi, nasrani tuah
Takue ji pisah, meung han tem ikot
Laju gereja, di cipta bagah
Bit cukop indah, ngon meuh ji balot
Mangat le syara,ji teuka singgah
Dan lom beu beutah,hate beu leumbot
Teutapi sayang, karang kolam lawah
Utom ka rubah, on ji teumeung krot
Meu sidroe pih tan, insan tem seumbah
Bahkan ji ludah, ji toh ek geuntot
O’h ban ji di deungoe, ban meunoe ulah
Raja ka marah,ureung dum ji dhot
Rasa sang pungoe,meuseumoe icah
Beungeh meuleupah,greja tan lagot
Nibak teuntara, sigra ji titah
Bangunan ka’bah,singoh tanyoe tot
Meuseubab nyata,syahra dum tarah
Keudeh di langkah,nyoe han di sambot
Singoh tujuan,rijang di peu sah
Keudeh u mekah,rauh di kuncot
Lam perjalanan,sinan di rupah
Harta di beurkah,ureung di carot
Abdul muthalleb,sabet nyan saah
Na chit di rampah,unta di garot
Tapi hana trep,geu alet ilah
Yue pulang leugah,tan rasa takot
Teuma di seumong,tanyong abrahah
“Pue seubab di kah,nyoe ka peu turot”?
” tan ka teuropong,gampong lam sukar
Gadoeh daerah,ka’bah ku reubot”?
“Meunyoe nyan unta,harta ulon sah
Patot ka seurah”, meunan geu seu ot
“Teutapi beda,ka deungon ka’bah
Teuntee le ALLAH,Droe geuh peulimbot !”
Alheuh nyan sampoe,ji peutoe ka’bah
Jineuk peu rubah,bangunan ji lhot
Teutapi dudoe,paloe meu leumpah
Han jitem gajah,malah ji surot
Hana trep langgeng,kireman ALLAH
“Ababil” gagah,batee ji peu rhot
Meu ribee ticem,di baleng ngon pah
Utak dum bicah,musoh pih kuyot
Hanco dum mate,bar hai sahbah
Lam apoh apah,patah bruek tuot
“Bukti neuk lahe,srikande ummah
YA RASULULLAH,nabi nyang lucot”
E’h nan keuh saja,haba risalah
Rika seujarah,nyang tanyoe “salot”
Meua’h kolam kata,cupa meu unggah
Akhe seleuah,WASSALAM lon top.
 |
| Cae Aceh Lucu, Bahkan Ji Ludah, Ji Toh Ek Geuntot |