Adak peungeuh trang, mata teuh rabon.
Kheundak bak tuboh, ka uleh Tuhan.
Hansoe ek sugang, meutaeu manteong.
Keuheundak Allah, u ateuh manusia.
Tiep tiep keutukan, hanjeut ta tasigong.
Bukon mustahe, neupubuet meunan.
Lam jeut jeut bidang, jeut neutre lansong.
Teoh nyang geusuroh, patoh hai taulan.
Bek chok ngon waham, tacuba jak kong.
Bek niet lam hate, ngon peurasaan.
Haba neujak tran, GALAK-GALAK LON.
Dunya nyoe hai kak, teumpat meunumpang.
Cuma cobaan, geubri le Rabbon.
Peu ek tapubuet, suroh di tubuh.
Meunyang geularang, peu ek tasigong ?
Bek neuniet hudep, cuma keu wayang.
Bek cit keuseunang, wahe e ampon.
Bek neuniet hudep, jeut beurangkaban.
Ban nyang aturan, kolam droe neuh lansong.
Tapi neupike, oh nyawong leukang.
Peu ek meulang-lang, tuboh meupatong ?
Peutra keuh singoh, akan akhir.
Peu ek lon tuan, bandum neuk tanggong ?
Lam hudep dilee, taturi Tuhan.
Teoh nyang geupeunan, Allah that agong.
Cara taturi, tapeukeong keyakinan.
Hate di dalam, tapleu ie eumbon.
Iman lam hate, beucahya beundrang.
Pubuet seumbahyang, nyan peurlee bak phon.
Keurna seumbahyang, meunyan keuh tiang.
Akan tampungan, buet laen lansong.
I’tikeut beujroh, beugleh that iktikad.
Meubek na lapang, di dalam jantong.
Watee geucok rhoh, ngat phui hai taulan.
Bek ban meulayang, hana soe tulong.
Bek hudep tanyoe, ban buet hewan.
Minom ngon makan, watee pruet busong.
Mita teumpat eh, oh watee malam.
Buet jak meuagam, watee ka meurhong.
Meubit keuh meunan, sifeut lam badan.
Rugoe jeut manusia, geubri le Rabbon.
Beuna tamalee, beuna pikiran.
Hak keulakuan, tapubuet lansong.
Meukrue seumangat, jantong boh pisang.
Keu kuwah santan, pasoe lam mangkong.
Beh kajeut jilee, oh noe peuneusan.
Meupat han timang, neukoh beupuntong.
Neukoh nyang ganje, haba karangan.
Izin keu abang, cit kana kolam lon.
Lon ucap laju, deungon wassalam.
Akhirul kalam, jinoe ulon treon.
 |
| Ca’e Aceh Haba Neujak Tran Galak-Galak Lon |