Nur Muhammad, leuzat tuloe.
Beureukat nyan, ngon mukjizat.
Tanyoe ummat, seunang dudoe.
Seunang hudep, dak meukarat.
Kheundak bak Rabb, cit geu ujoe.
Geukalon kri, na meutat tat.
Peu ek selesai, meunyan duroe.
Hudep mate, sit katroh hat.
Pakri mampu, oh meupaloe.
Teutapi hai, seugoh neumat.
Ta ibadat, malam uroe.
Seugoh nyawong, roh lam ikat.
Seugoh jeurat, tilam busoe.
Tajak tadeong, beu taingat.
Buet manfeuat, pubuet beutroe.
Yang manfeuat, ateuh kudrat.
Laot darat, beu ek gilhoe.
Tunong baroh, timu barat.
Beujithee that, tanyoe sidroe.
Meuksut jithee, beulam JANNAT.
Beutiep dikala, sinan laloe.
Bek lam JAHNAM, tanyoe geuglap.
Cit fana that, sinan adoe.
Maka uleh, keu nyan seubab.
Asoe kitab, beutapakoe.
Ngon Al-Qur’an, beutanyoe mat.
Khatam ummat, dalam bumoe.
Na peuneugah, lam riwayat.
Lon teuingat, hadist asoe.
Ummat Nabi, kolam Muhammad.
Yang awai that, lop meuligoe.
Lam meuligoe, syurga jannat.
Sinan teutap, aduen adoe.
Nabi laen, yang po ummat.
Neupreh siat, dang abeh nyoe.
Teuma lagi, lom awai that.
Yang geuikat, pih geutanyoe.
Lam nuraka, geurhom leugat.
Abeh azab, ka seuleusoe.
Miseu tanyoe, bek meularat.
Jinoe dikala, dalam bumoe.
Luweung watee, beutaingat.
Keu hadharat, beu tapujoe.
Bek meugesee, wareh sahbat.
Tanyoe ummat, ingat keu Poe.
Bek keuh singoh, roh lam laknat.
Cit meuwat wat, ngon meupaloe.
Samadua, alur barat.
Ngon blangkasab, jarak han toe.
Tuhan tulong, kamoe ummat.
Beu syufeuat, roh oh dudoe.
Trienggadeng ngon, paya langat.
Ngon blangtufat, tan meusahoe.
Beh ka dilee, oh noe radat.
Lon peutamat, ka seuleusoe.
 |
| Ca’e Aceh Bek Keuh Singoh Roh Lam Laknat |