Bek Sagai Tuwoe Seulaweut Nabi – Teks Ca’e Aceh
Salam alaikum saleum ulon bi
Keumandum akhi Pustaka Sastra
Loen tuan teuka cuba meurawi
Kisah di nabi rasul ambia
Pat na yang salah neuperbaiki
Seujarah nabi kadang meutuka
Kadang meucawoe ceurita loen bi
Neutulong kajie wahei syedara
Jinoe lon cerita thon lahe nabi
Keuheundak Rabbi rasul mulia
Nyan kheuh abad nyan ka’bah yang suci
Abrahah keuji dijak prang kuta
Pasukan gajah gagah beurani
Jidong meuriti ngon bala teuntra
Cicem ababil pasukan Rabbi
Jipoe meupueti leungkap seunjata
Lajue jiseurang abrahah keuji
Ngon batee orisinil dari nuraka
Pasukan hancoe han tatupeu hi
Lagee on camplie ka ulat seuba
Ureueng kala nyan kaom jahili
Buet jih that keuji seumah beurhala
Nyan kheuh watee nyan thon lahei nabi
Meunan geurawie uleh ulama
Aneuk nyang yatim Abdullah abi
Tuhan teukeudi lahe u donya
Beurkah geupeutren rahmat pih geubi
Ban saboh naggri ikot meurasa
Rabiul permulaan dua blas hari
Lahei di nabi Aminah bunda
Teuma oh lheuh nyan laju mom geubi
Peungasoh nabi Sakdiyah mulya
Sopan ngon santon ka leumah dali
Manyak that tari ceudah deuh rupa
Meunan kheuh tanda keu saboh bukti
Calon di Nabi rasul ambia
Umu ka nam thoen pang ulee nabi
Keuheundak Rabbi poma geubungka
Abdul Muthalleb nyang dong keu wali
Geu asoh nabi sampai akil balig cukup akal
Nibak si uroe peumuda suci
Gob nyan meuturi Khadijah qubra
Geujok beulanja hareuta geubi
Pangkai di nabi jak meuniaga
Geumeukat jujor adat jeut uji
“Poe Tuan Siti” galak saidina
Jadeeh meukawen watee nyan nabi
Khadijah siti janda nyang kaya
Di guha hirak Nabi seumeudi
Peurintah Rabbi malaikat teuka
Ka geuyu baca al-qur’an suci
Iqra’ hai akhi ayat phon geuba
Leupah teumakot watee nyan saidi
Meugok-gok bibi pucat ngon wajah
Malaikat trok nyan kheuh Jibrili
Geujak kolam Nabi fireuman geuba
Nibak watee nyan rasul ka resmi
Geuangkat saidi rasul ambia
Ka geuyue peutrok peurintah Rabbi
Amanah geubi bandum keu hamba
Peninggai gobnyan al-qur’an suci
Ngon hadist khudsi keu tanyoe hamba
Bek sagai tuwoe seulaweut nabi
Tuhan meujanji asoe syeuruga
Et nan kheuh cerita nyang jeut ulon bi
Cuba teuliti salah ngon beuna
Tamohon ampon bak “Maha Suci”
Jan laen kali tasambong teuma.
Aneuk beurujuk dicung kolam seuri
Simirapati jidong cong bara
Jak taseulaweut keupada Nabi
Syafa’at geubri di padang masya
Lon numpang saleum keu dewan juri
Haba lon rawi kadang na cupa
Maklum lon tuan nyoe ban lon cici
Partisipasi satoeh budaya.
 |
| Bek Sagai Tuwoe Seulaweut Nabi – Teks Ca’e Aceh |