Peudong Budaya, Ata Uroe Jeh – Teks Ca’e Aceh
Dengon bismilah, bak phon lon mula
Mangat bek cupa, wate lon tuleh
Salam alaikom, kawom kerabat
Saleum mulia, jaweub hai wareh
Sehat ngon tuboh, mandum anggota
Allah yang esa, kalheuh geu kikeh
Ka geuthok hate, jak tuleh rika
Tuk ikot kontes, keunoe lam bareh
Seulaweut saleum, rasul ambia
Ureung mulia, pangkat mentindeh
Keu al teman, serta kluarga
Mandum seumua, keunoe lon sapeh
Saleum horeumat, keu gure sastra
Lam sayembara, kolam meja puteh
Neu peugot pakat, jak ikot kontes
Peudong budaya, ata uroe jeh
Aneuk leuk kutru, dicong bak bangka
Aneuk cempala, dicong kolam manggeh
Bah jinoe laju, lam inti haba
Seugoh lon lupa, putra neuk tuleh
Wate phon lahe, saidil ambia
Dalam kluarga, cukop that peudeh
Saweub tan ayah, geu tinggai donya
Gopnyan golomna, lam kandong sideh
Wate ban lahe, rasul mulia
Abeh binasa, dum kafe kureh
Abeh dum ancoe, patong ubena
Tuhan di puja, awak nyan pateh
Plumah mukjizat, allah yang esa
Asoe lam donya, mandum geu peugleh
Mangat bek kutoe, lahe saidina
Tuhan karonya, ban ija puteh
Maka geutanyoe, wahe kerabat
Rasul lam donya, nyanbeu ta pateh
Beuna seulawet, sabe tip era
Sanjong baginda, lam hate sideh
Tameu khanduri, seu ala kada
Dak sikrek bada, seulaku kueh
Seulaku mampu, tanyoe na harta
Dak tan soe kaya, hana pu keudeh
Meubek ta male, ngon ureung lingka
Pike gop raya, dalong ji tindeh
Seubab di sinan, bukon meu ria
Meusoe yang rela, dengon hate gleh
Meumada ohnoe, keu asoe rika
Meu’ah saudara, nyeu salah tuleh
Saweub goh meuphom, dalam meu sastra
Baroe meu ija, jak atoe bareh Wasalam.
 |
| Peudong Budaya, Ata Uroe Jeh – Teks Ca’e Aceh |