Geulima payeh timoh to paya
sigeunap uroe han kuteumuleh
jareung lon peugleh asoe grup sastra
Meuseubab langet beungoh puteh gleh
hana roh lon eh peu-ubat mata
meuseubab haba pah tat kolam binteh
siat hai wareh lon ci tik jala
Leupah harom si jeumpa puteh
Meugareh-gareh kuneng meukama
aneuk muda paksa si gadeh
cukop paleh hate jih hana
Meunyo bang Pengko si agam blah jeh
Lon sambong gateh laen kumita
Seubab ‘oh lahe kaleuh geu-ureh
puteh bak puteh sukla kolam sukla
Nyoe sidroe dara adak puteh gleh
keu-ing ngon beuteh sang putroe raja
hana bang pungo paksa meugaseh
sigo bang gareh meunan peudaya
Sigoe jitulak geulumbang paleh
beujipeugaseh han le kugisa
pada dara jroh lam hatee peudeh
get keuh hai wareh laen tik jala
Agam geupeuget mata peut gareh
lam jeut-jeut tuleh na saboh donya
inong, rumoh dro, donya, ngon lapeh
meunan kupeugleh nyak sangkih haba
Jitik le inong, rumoh droe pileh
Jitulak gaseh, luah tat donya
donya Geupeujeut meulapeh-lapeh
meunan keuh wareh tamse si dara.
 |
| Panton Aceh Hana Bang Pungo, Paksa Meugaseh |