Panton Aceh Hanle Teugoda, Peu Nyang Gop Ratoh
Beurangri nanggroe, kahabeh tabloh.
Beurangteoh musoh, cit ka tatuban.
Meunghan get asoe, meudum ek haloh.
Rugoe kabeh troh, tagrak beujalan.
Walau tatuoh, nyuem eungkot muloh.
Meunyoe geurupoh, mangat han wayang.
Meuhana meuoh, qalbu lam tuboh.
Manteong mubee khoh, kanibak Tuhan.
Qalbu geutanyoe, ban Bintang tujoh.
Cahya seumeulhoh, jidu lam tubuh.
Meungget tajaga, kayem tasampoh.
Niscaya cit troh, tameudu seunang.
Pakri tajaga, deungoe rakan beh.
Sikrak lon ratoh, meungget neusimpan.
Meungbrok neuhila, lam bak peurapoh.
Meuhan lam iboh, neusrom beutajam.
Tajaga qalbu, bek brok sabe troh.
Kalam taratoh, ngon nama Tuhan.
Takheun Lailah, beusunggoh sunggoh.
Lafai beutadroh, tiep tiep keutukan.
Tiep luweung watee, takheun sireutoh.
Allah nyang peutroh, lezat di manyang.
Niscaya hate, cit ka meubungkoh.
Dak gop seuleusoh, cit han le tenggelam.
Walau fiteunah, teuka gop ruboh.
Lam dawok sunggoh, saba han deundam.
Hanle teugoda, peu nyang gop ratoh.
Munom ngon puyoh, ka meupat simpan.
Ka meuoh peusee, puree gunong goh.
Ka meuri kawoh, meuoh peuneusan.
Ka meuoh peugleh, adang sie ruboh.
Dak hitam sunggoh, cit lang geumilang.
Bungong rawatu, luhu nibak coh.
Bungong cut haloh, mawoe bineh blang.
Meung get lam Qalbu, bagoe tasawoh.
Hanroh tapajoh, bangke uleu lhan.
Meunghan get qalbu, meudireu musoh.
Beurangho tadroh, cit kagop simpan.
Adak beutajak, rata jeut paloh.
Tunong ngon baroh, jibeoh le rakan.
Seubab jimeubeoh, deungki tasaloh.
Ceulaka tuboh, beurangsoe manusia.
Leubeh get aduen, rayeok ngon haloh.
Bek na keuh tatroh, meunan piasan.
Buleun dua blah, meusu geumuroh.
Paseung pih katroh, kangop tualang.
Beh ka keuh oh noe, haba lon ratoh.
Geunantoe suloh, keudroe lon karang.
Lon niet meupeugah, keugop Hana troh.
Seubab that jioh, ulon ngon abang.
Miseu na meuheut, nyompat peunyuloh.
Tilek beusunggoh, tiep tiep keutukan.
Bareh han santeut, pakhok meucoh coh.
Haraf meudaboh, Hana get ragam.
Neumaklum ulon, cit aneuk lapoh.
Gohlom that sunggoh, tilek keunarang.
 |
| Panton Aceh Hanle Teugoda, Peu Nyang Gop Ratoh |