Pedoman Hudep Bak Nabi
Salam’alaikum, tanggloeng hikeumat
Ngoen kru seumangat, mula phoen rinteh
Seugeunap pujoe, keu poe ta intat
Moga troeh rahmat, han abeh abeh
Seulawet saleum, akan muhammad
Panghule ummat, yang ka neu pileh
Geunaseh allah, leumah hikeumat
Rayoek mukjizat, meugah meulapeh
O’h lheh nyan teuman, akan sobat
Saleum meu ikat, meunan tarinteh
Seumoga sabee, allah bri rahmat
Lam syurga meuhat, teumpat geuh sideh
Takzem keu guree, ritee uloen lhat
Yang peukoeng budpekerti, nibak teumuleh
Yang ka geupapah, keuneubah riwat
Moga beu seuhat, asumsi beu gleh
Rabiul awai, punoeh ngoen rahmat
Lam qur’an meuhat, meunan meutuleh
Buleun mulia, tanda nibak rab
Lahee muhammad, nabi geunaseh
Meu nyan keuh rasul, yang rayoek pangkat
Laen hai sahbat, hana soe langgeh
Ngoen wab na nabi, geubri hikeumat
Hudep muk’jizat, meulapeh lapeh
Rupa geuh ceudah, gagah leupah that
Biet cukoep mahir, hatee leumpah gleh
Meu cahya muka, ban sutra kilat
Meung soe yang lihat, mata sang peudeh
Di nanggroe mekkah, allah peu teumpat
Teumpat jeut kiblat, sinan beu meuceh
Lam kawoem maksiet, meugriet lam sesat
Akai biadab, duem awak kureh
Sinan tan harga, syara keurabat
Hukoem yang jimat, keubiet seup paleh
Meung soe yang teuga, kaya ngoen ahli
Jeut akai bedebah, han puleh puleh
Ureung duem mabok, maksiet leumpah brat
Sidum nan sesat, duem awak kureh
Ureung duem mate, jiseube lam jrat
Keubiet biadab, lumboi sa paleh
Nyoe ureung inoeng, jiseunoem lam jrat
Gadoeh martabat, abad uroe jeh
Bacut hana nyuem, dak puteh langsat
Jaroe ji ikat, jikoeh ngoen gateh
Keu azeub ilahi, tan na ji ingat
Berhala meuhat, yang jiteum pateh
Sinan keuh punca, aktual lam riwat
Lahee muhammad, keunan geupileh
Lam kaom maksiet, allah peu teumpat
Supaya meuhat, islam jipateuh
Yang na soe angkat, harkat martabat
Beuk le lam sesat, jalan jipileh
Geuba aliran, qur’an geu surat
Geu peudeuh rahmat, hukoem beu meuceh
Beuk le kolam patong, yue tuloeng meuhat
Tapi nibak zat, kolam allah keudeh
Teutapi jinoe, meupaloe deuh krat
Ummat muhammad, ka meutuka keh
Lahee lam islam, pakoen jeut seusat
Akai biadab, pakoen tasapeh
Hukoem agama, hana ta ingat
Dalam buet laknat, ka tajak sapeh
Nibak al-qur’an, tan le tameumat
Budaya barat, galak teuh abeh
Inoeng ngoen agam, ka saban tingkat
Saduem derajat, kolam hi hai wareh
Kabeuh duem laloe, meupaloe that that
Meutuka kiblat, ka salah pileh
Pakoen keuh meunan, rakan seujawat
Reusam ngoen adat, taroem lam binteh
Ta ci keuh pikee, dilee meusiat
Puna manfa’at, yang ka tapileh
Gisa beu bagah, beuk allah laknat
Beudoeh ta taubat, yoeh goeh meulanggeh
Hudep lam donya, cuma keuh siat
Akhirat teumpat, yang keukai sideh
O’h no meumada, rika loen intat
Me’ah hy sahbat, nyoe na meulanggeh
Maklum tan ilme, rite loen ikat
Beuk jeut keu upat, entek hy wareh.
 |
| Lirik Syae Aceh, Pedoman Hudep Bak Nabi Oleh: FAXRIEL FAIZ AZKALZ |