saleum lon layang, likot deungon keu.
neusambot saleum, ngon hate lapang.
ngat goet akibat, singoh kolam rabbu.
Alhamdulillah, syukur keu Tuhan.
yang peujeut alam, rata penjuru.
seulaweut saleum, keu Muhammadan.
rasul tauladan, cukop musyuhu.
deungan na watei, nibak nyoe malam.
saboh karangan, ulon neuk sinteu.
keu pada wareh, ureung iseulam.
yang asoe dalam, cahya bintang hu.
ureung jak sambot, nibak nyoe malam.
geuneuk rayakan, nyan tahun gres.
bandum penduduk, lam dunya Tuhan.
kasiap tubuh, geupreh deuh geu eu.
bak poh dua blah, sang troh watei nyan.
inong ngon agam, kateudong lugu.
na yang mat lilen, mercon pih saban.
ria hana ban, meunan dum laku.
na sit yang geujak, deungan pasangan.
deungan yah sigam, ureung nyan jak eu.
ladom yang muda, geujak pacaran.
jak sambot malam, keu Tahun baru.
tetapi lon deungoe, bacut khabaran.
hai wareh taulan, kanibak Abu.
hanjeut geutanyoe, tajak rayakan.
nibak nyoe malam, tajak deong ikeu.
hanjeut taikot, lagei nyan macam.
karna nyoe malam, kon tanyoe tunggu.
nibak nyoe malam, nyan atra syaitan.
kafe jahannam, yang peuphon laku.
geutanyoe aduen, ureung iseulam.
satu MUHARRAM, jeh yang deuh dikeu.
meunyan tanyoe preh, hai yah si agam.
tanyoe rayakan, ngon sikrak Qulhu.
tameuseulaweut, tabeut Al-Qur`an.
Yasin talayang, bunyi merdu.
mangat diteupue, tanyoe iseulam.
satu muharram, manteong beulaku.
meubek neuikot, nibak nyoe malam.
hai ureung islam, rata peunjuru.
beuna neuingat, kolam buet geularang.
bek salah jalan, tapubuet laju.
di awak kafetaria, meuleupah seunang.
karoh tapaban, lagei jih padu.
peudahai tanyoe, ureung iseulam.
hareum di tubuh, ikot laen su.
jikalau geutanyoe, han muhoe faham.
keudeh hai taulan, tanyong kolam abu.
kiban peundapat, yang geujeulaskan.
ateuh nyoe malam, si Tahun Baru.
thon dua ribee peut, manteong teubayang.
akan akibat, kiban keuh laku.
wap salah pubuet, nibak kurun nyan.
maka keuh Tuhan, bala geusinteu.
nyan geupeuingat, keu ureung islam.
bek salah jalan, karoh tanyoe geu.
beuna meu ubah, teupeh asumsi.
meubek guransang, tapubuet laju.
oh noe lon pada, cae lam karang.
meupat tan reumbang, meuah neudireu.
saja lon tuleh, meunoe hai taulan.
mangat neufaham, yang tan neutupue.
 |
| Panton Aceh Ladom Yang Muda Geujak Pacaran |